AKAM

• [AN_353-1] āḷviṉai pirital um uṇṭu ō piriyiṉum
• [AN_353-2] kēḷ iṉi vāḻiya neñcu ē nāḷ um
• [AN_353-3] kaṉavu kaḻintu aṉaiya āki naṉaviṉ
• [AN_353-4] nāḷatu celavu um mūppiṉatu varavu um
• [AN_353-5] aritu peṟu ciṟappiṉ kāmattu iyaṟkai um
• [AN_353-6] i nilai aṟiyāy āyiṉum ce nilai
• [AN_353-7] amai āṭu am kaḻai tīṇṭi kalleṉa
• [AN_353-8] ñemai ilai utirtta eri vāy kōṭai
• [AN_353-9] neṭu veḷ kaḷari nīṟu mukantu cuḻala
• [AN_353-10] kaṭu veyil tirukiya vēṉil ve kāṭṭu
• [AN_353-11] uyaṅku naṭai maṭa piṇai taḻīiya vayaṅku poṟi
• [AN_353-12] aṟu kōṭṭu eḻil kalai aṟu kayam nōkki
• [AN_353-13] teḷ nīr vēṭṭa ciṟumaiyiṉ taḻai maṟantu
• [AN_353-14] uṇ nīr iṉmaiyiṉ olkuvaṉa taḷara
• [AN_353-15] maram niḻal aṟṟa iyaviṉ curaṉ iṟantu
• [AN_353-16] uḷḷuvai allai ō maṟṟu ē uḷḷiya
• [AN_353-17] viruntu oḻivu aṟiyā perum taṇ pantar
• [AN_353-18] varunti varunar ōmpi taṇṇeṉa
• [AN_353-19] tātu tukaḷ utirtta tāḻai am kūntal
• [AN_353-20] vīḻ itaḻ alari mel akam cērtti
• [AN_353-21] makiḻ aṇi muṟuval māṇṭa cēkkai
• [AN_353-22] nammoṭu nal moḻi navilum
• [AN_353-23] pommal ōti puṉai iḻai kuṇaṉ ē